Ел Президенті Қазақстан халқына Жолдауында білім беруді одан әрі дамыту және педагогтерді қолдау мәселелеріне ерекше назар аударды.
Мемлекет басшысы үш ауысымда оқитын және апатты жағдайдағы мектептердің мәселелерін шешу үшін «Жайлы мектеп» жаңа ұлттық жобасын қабылдауды тапсырды.
2021 жылы 250-ден астам мектеп іске қосылған болатын. Биыл тағы 230-дан астам мектепті іске қосу жоспарланып отыр. Осыған қарамастан мәселе әлі өткір күйінде қалып отыр. Ұлттық жоба аясында 2025 жылға қарай кемінде 840 мың оқушы орнын құру жоспарда бар.
Сонымен қатар жаңа мектептер заманауи құрал-жабдықтармен, қажетті сыныптар санымен және спорт залдарымен жабдықталуы керек. Бастауыш және жоғары сыныптарды жеке асханалары, жуынатын бөлмелері, спорт залдары бар бөлек блоктарда оқыту ұсынылып отыр.
Соңғы 3 жылда балабақша тәрбиешілерінің жалақысы екі есеге дейін өскенімен, оның білікті кадрларды тартуға әлі де жеткіліксіз екені байқалып отыр. Осыдан бірнеше жыл бұрын ЖООдағы бір орынға 10 адамнан астам үміткер болса, қазір 1-ге де жетпейді.
